Ke motho wa boMmamogale-a-Matshobane
Yo go tweng Kgabotsi-a-gaabo Modiana
Motho wa boNtsho-a-dioma

E e riling fa e tlhola
Ya tlholela Maimane
Ya ema ka maroo khwiting
Ga re kwena e tsene le Kgomo mferong
Ya re beng ba kgomo ba sala ba e batla

Fa beng ba Kgomo basala ba e batla
Kgabo ya tlhaga
Ya thibelela kwena matsibogo
Ba re 'tlhare se le mahuhumele
--a gaabo Motshwanetsi
E rile ke se bona ka re ke ntlong
--ya morwa Motsho

Ba re ya kgetla kwena
Ya kgetla modubu le magokare
Mmamogale-a-Matshobane,tshii,
Tshii ya mabitse;
Ke letse le tlala kwa morakeng wa etsho,
Kwa manganganeng a Maswene

Tloga le e bone e tshaba ka mala a legotlo
E tshaba ka sebelebele sa motho
A e tle e bonwe ke methepa le metolodi-
Ditswakgabong tsa marumo a tuka.